Saison 2012

Des 125-jährische Jubiläum vun de Freiwillische Feierwehr von PF-ED-OP (Pingschtweed-Edigum-Oppa) schteht korz bevor. Es wird bereits schun mächtig geübt, damit des alde Feierwehrlied mol widder so richdisch zur Geldung kumme kann. Noch diverse feichtfröhlische Prowe, schteht eigentlich änner gelungene Uffführung nix meh im Wesch. De Alois Winter hot als Üwwerraschung en junge Solodrumbeder aus Mannem engagiert, der des alde Feierwehrlied gemeinsam mit dem Chor uffführe soll. Awwer als in de Kerch en vermeindliche Brand ausbreche dud, is die Kataschtroph nimmie uff zu halde. Un dann dud ach noch de Feierwehrskummandant dorch en Unfall sei Gedächtnis verliere, womid dann des Jubiläumsfeschd gewaldisch uff de Kibbe schtehe dud

Wie werd des Chaos wohl ausgehe?

An dem ganze Schlamassel sin beteilischt; de gudmüdische un ruhische Borjemäschder Rudolf Steininger, sei herrschsüchdischi Fra, die Wilma un deren gemeinsamie, langsamie un naive Dochder (uff pälzisch e Drutscherl) Rosalinde. Mitmische dud do ach noch de gschiedene, jähzornische awwer meh wie wehleidische Feierwehrskummandant namens Alois Winter. Sei Dochder, die Barbara (Babsi) is do vun em ganz annere Kalliwer; erschtens hübsch, kokett un meh wie schlachferdisch, un zwettens üwwerhaupt nit uff de Mund gfalle. Die Oma vun de Babsi, die Emilie, is lischdisch wie en Fuchs, hot awwer e klänes Problem mit ihre Ohre. De reimende Lehrer, Hubert Stark, tracht mit seiner Dichderei ach nit unbedingt zur Lösung vun dem ganze Problem bei. De verklärte un vergesslische Parre, Gottlieb Fröhlich, werd zwar vun seiner resoluden un engaschierde Haushälterin Maria Stein, unnerstützt, awwer besser werds dodorch ach nit. Die attraktive un ledische Ärztin, Hannelore Engel, bringt manches Männerherz in Wallung, is awwer letschen Endes froh, dass es noch Männer gewwe dud. Zum Schluss is do noch der schüchterne Drumbeder, Peter Stiefel, der dorch sei Uffdauche zwar des Ganze zum Rolle bringt, awwer letztendlisch ach mit seim Drumbedeschpiel die ganz Gschicht uffkläre dud, un somit kann dann zum Schluss des alde Feierwehrlied so rischdisch gschmettert werre, dass de Regensburcher Domschpatze die Träne kumme deden, un alles doch noch e gudes Ende nemme dud.

Höre kann ma des alde Feierwehrlied in de

katholisch Kerch St. Albert in Ludwigshafe-Pfingstweide un zwar am Samstach de 05. Mai 2012 / Mondach de 07. Mai 2012 / Mittwoch de 09. Mai 2012 / Freidach de 11. Mai 2012 un am Samsdach de 12. Mai 2012.